देशका केही भागमा हावाहुरीसहित वर्षा र हिमपातको सम्भावना, महाशाखाले सतर्क रहन आग्रह -Brighter Network

Top Post Ad

चैत ३, हाल देशमा पश्चिमी न्यूनचापीय प्रणाली र स्थानीय वायुले मौसममा आंशिक प्रभाव पारिरहेको मौसम पूर्वानुमान महाशाखाले जनाएको छ।

महाशाखाका अनुसार सुदूरपश्चिम, कर्णाली र गण्डकी प्रदेशमा आंशिकदेखि सामान्य बदली भएको छ भने लुम्बिनी प्रदेश र अन्य पहाडी क्षेत्रमा आंशिक बदली रहेको छ। बाँकी भू–भागमा मौसम प्रायः सफा रहेको छ। कर्णालीका केही स्थान र सुदूरपश्चिमका एक-दुई स्थानमा हाल मेघगर्जन र चट्याङसहित हल्का वर्षा भइरहेको छ।

आज दिउँसो सुदूरपश्चिम, कर्णाली र अन्य पहाडी क्षेत्रमा आंशिकदेखि सामान्य बदली रहनेछ भने बाँकी भागमा मौसम सामान्यतः सफा रहनेछ। सुदूरपश्चिम र कर्णालीका पहाडी क्षेत्रमा केही स्थानमा तथा अन्य पहाडी क्षेत्रमा एक-दुई स्थानमा मेघगर्जनसहित हल्का वर्षाको सम्भावना रहेको छ।

यस्तै, सुदूरपश्चिम र कर्णालीका उच्च पहाडी तथा हिमाली क्षेत्रमा हल्का हिमपातको सम्भावना छ। अपराह्नतिर कोशी, मधेश, बागमती, गण्डकी र लुम्बिनी प्रदेशका केही स्थानहरूमा हावाहुरी चल्न सक्ने महाशाखाको अनुमान छ।

राति कोशी प्रदेश र देशका अन्य पहाडी भागहरूमा आंशिक बदली रहनेछ भने बाँकी स्थानमा मौसम प्रायः सफा रहनेछ। पहाडी क्षेत्रमा एक-दुई स्थानमा हल्का वर्षा र हिमाली क्षेत्रमा हल्का हिमपातको सम्भावना रहँदा कोशी र मधेशका केही स्थानहरूमा हावाहुरी पनि चल्न सक्नेछ।

महाशाखाले मौसमको यो अवस्थाले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पार्न सक्ने भन्दै आवश्यक सतर्कता अपनाउन सर्वसाधारणलाई आग्रह गरेको छ।