ठूलो परिमाणमा गाँजासहित दुई महिला पक्राउ

उदयपुर, जेठ १७ – उदयपुर जिल्लाको चौदण्डीगढी नगरपालिका–१, रानी टारबाट प्रहरीले ठूलो परिमाणमा गाँजासहित दुई महिलालाई पक्राउ गरेको छ। प्रतिबन्धित लागू औषध गाँजा लुकाइछिपाई राखिएको सूचना पाएपछि जिल्ला प्रहरी कार्यालय उदयपुर र इलाका प्रहरी कार्यालय रामपुरठोक्सिलाको संयुक्त टोलीले उक्त ठाउँमा छापा मारेको हो।

प्रहरी नायब उपरीक्षक तथा सूचना अधिकारी केदारमान दोङका अनुसार रत्न माया श्रेष्ठ नामक महिलाको घरबाट ३५ बोरा गाँजा बरामद गरिएको छ। ती बोरामा लुकाइएको गाँजाको तौल १,१४३ किलो २७५ ग्राम रहेको प्रहरीले जनाएको छ।

गाँजा बरामद भएपछि घरधनी रत्न माया श्रेष्ठ (करिब ४१ वर्ष) र त्यही ठाउँकी कमला श्रेष्ठ (करिब ४२ वर्ष) लाई नियन्त्रणमा लिई अनुसन्धान अघि बढाइएको छ।

प्रहरीका अनुसार हाल उदयपुर जिल्लामा लागू औषधको ओसारपसार र प्रयोग बढ्दो अवस्थामा छ, जसका विरुद्ध सुरक्षाअधिकारिहरूले निगरानी र कारबाहीलाई प्राथमिकतामा राखेका छन्।