एक वर्षअगाडिबाट फरार रहेका दुई जना प्रतिवादी प्रहरीको नियन्त्रणमा

कात्तिक १० गते, बागलुङ । अदालतले सजाय तोकेर फरार रहेका दुई जना प्रतिवादीलाई एक वर्षपछि प्रहरीले पक्राउ गरेको छ । पक्राउ परेकामध्ये एक जना बैंकिङ कसुर र अर्को जना पशुपक्षी विरुद्धको कसुरमा दोषी ठहरिएका हुन् ।

पश्चिम बागलुङको गलकोट प्रहरीले गलकोट नगरपालिका–१, दुदिलाभाटीका ६० वर्षीय जङ्गबहादुर पुन र सोही ठाउँका २० वर्षीय सुपिद नेपालीलाई सोमबार पक्राउ गरेको जनाएको छ ।

उच्च अदालत पाटनले बैंकिङ कसुर मुद्दामा पुनलाई ३७ लाख रुपैयाँ जरिवाना र ६ दिन कैद सजाय तोकेको थियो । सो सजाय कार्यान्वयन हुनुअघि नै उनी फरार भएका थिए ।

त्यस्तै, जिल्ला अदालत बागलुङले २०८१ असार ५ गते पशुपक्षी विरुद्धको कसुरमा दोषी ठहर गर्दै नेपालीलाई दुई महिना सात दिन कैद सजाय सुनाएको थियो ।

प्रहरीका अनुसार लुकीछिपी बसिरहेको सूचनाका आधारमा दुवै जनालाई पक्राउ गरी अदालतको आदेश अनुसार जिल्ला कारागारमा पठाउने तयारी गरिएको छ । जिल्ला प्रहरी कार्यालय बागलुङका सूचना अधिकारी बसन्त पाण्डेका अनुसार फरार प्रतिवादीहरूलाई पक्राउ गर्न विशेष खोजी टोली खटाइएको थियो ।