स्याङ्जा, मङ्सिर ११ गते । स्याङ्जाको वालिङबाट चोरी भएको मोटरसाइकलसहित दुई जना किशोरलाई प्रहरीले पक्राउ गरेको छ ।
वडा प्रहरी कार्यालय वालिङका अनुसार वालिङ नगरपालिका–८, भी.आई.पी. टोलबाट मिति २०८२ मङ्सिर ११ गते साँझ ५:४० बजे मोटरसाइकल चोरी भएको भन्ने सूचनाका आधारमा अनुसन्धान अघि बढाइएको थियो ।
अनुसन्धानका क्रममा प्रहरी टोलीले सोहि दिन साँझ करीब ७:५० बजे वालिङ नगरपालिका–९ सुर्कोदी दरबारचोकबाट हराएको लु.४२ प.१९७१ नम्बरको बजाज १५० सिसी पल्सर (रातो–कालो) फेला पारी दुई जना किशोरलाई नियन्त्रणमा लिएको हो ।
पक्राउ पर्नेहरू वालिङ नगरपालिका–२ यादी बस्ने १६/१६ वर्षका दुई किशोर (परिवर्तित नाम थर S र T) भएको प्रहरीले जनाएको छ । किशोर भएकाले उनीहरूको नाम विवरण गोप्य राखिएको छ ।
उनीहरूलाई मङ्सिर १२ गते जिल्ला अदालत स्याङ्जामा उपस्थित गराइएकोमा अदालतले ५ दिनको म्याद थप गरी चोरीसम्बन्धी मुद्दामा थप अनुसन्धान अघि बढाइने जिल्ला प्रहरी कार्यालयले जनाएको छ ।
Posts
