मङ्सिर १२, पोखरा । कास्की प्रहरीले ठूलो परिमाणको इन्जेक्टेबल लागू औषधसहित एक महिलालाई नियन्त्रणमा लिएको छ। लागू औषध बिक्री–वितरण भइरहेको भन्ने गोप्य सूचनाको आधारमा पोखरा महानगरपालिका–६, लेकसाइडस्थित एक डेरामा बस्ने २३ वर्षीया आन्सी परियार पक्राउ परेकी हुन्।
प्रहरीका अनुसार मिति २०८२ मङ्सिर ११ गते दिउँसो करिब १ बजे जिल्ला प्रहरी कार्यालय कास्की र लागू औषध नियन्त्रण ब्युरो पोखराको संयुक्त टोलीले उनको कोठामा तलासी गर्दा डाईजापाम ३४ एम्पुल, फेनेरागन ३३ एम्पुल, ब्रुफिनोर्फिन ३४ एम्पुल गरी १०१ एम्पुल लागू औषध बरामद गरेको हो। साथै प्रहरीले घटनास्थलबाट मोबाइल फोन १ थान समेत बरामद गरेको जनाएको छ।
बरामद गरिएको पदार्थ लागू औषधको गैरकानुनी कारोबारमा प्रयोग हुने उच्च जोखिमयुक्त इन्जेक्टेबल औषध हुन्। प्रारम्भिक अनुसन्धानबाट ती औषध स्थानीय स्तरमा बिक्री–वितरण हुँदै आएको आशंका गरिएको प्रहरीले जनाएको छ।
आरोपित परियारलाई नियन्त्रणमा लिएर कास्की जिल्ला अदालतबाट ५ दिन थुनछेक अनुमति लिएर थप अनुसन्धान अघि बढाइएको जिल्ला प्रहरी कार्यालय कास्कीले जानकारी दिएको छ।
प्रहरीले लागू औषधका कडा निगरानी र नियन्त्रणमा अभियानलाई अझ सघन बनाइएको तथा यस्ता गैरकानुनी क्रियाकलापबारे सुराकी दिन स्थानीयलाई समेत आग्रह गरेको छ।
Posts
