नागढुंगास्थित ट्राफिक प्रहरी वृत्तमा खटिएका एक प्रहरी सहायक हवल्दार इन्स्पेक्टरको हातबाट चड्कन खाएका छन्। ट्रक चालकसँग पैसा लिएको आरोप लागेपछि इन्स्पेक्टर जितेन्द्र साहले उनलाई सडकमै थप्पड हानेको भिडियो सामाजिक सञ्जालमा तीव्र रूपमा फैलिएको छ।
घटना बुधवारको हो। भिडियोमा देखिएअनुसार ट्राफिक प्रहरी प्रभाग, नागढुंगामा कार्यरत सहायक हवल्दारलाई साहले सार्वजनिक स्थलमै अपमानजनक रूपमा कुटपिट गरेका छन्। उक्त दृश्यले प्रहरी संगठनभित्रको अनुशासन र आन्तरिक व्यावसायिक व्यवहारबारे बहस चर्किएको छ।
इन्स्पेक्टर साह ट्राफिक प्रहरी वृत्त नागढुंगाका प्रमुख हुन्। उनले हवल्दारले ट्रक चालकसँग अवैध रकम लिएको देखेपछि कारबाहीस्वरूप कुटपिट गरेको आफ्नो कमाण्डमा जानकारी गराएको स्रोतले जनाएको छ।
उपत्यका ट्राफिक प्रहरी कार्यालयका एसपी दीपक गिरीले घटनाबारे छानबिन भइरहेको बताउँदै, "अनुशासनको नाममा सार्वजनिक स्थलमा यस्तो व्यवहार गर्नु उपयुक्त हो वा होइन भन्ने समेत मूल्याङ्कन हुँदैछ," भन्नुभयो।
सडकमै देखिएको आन्तरिक कारबाहीको यो दृश्यले प्रहरी संगठनको छविमा प्रश्न उठाइरहेको छ भने ट्राफिक सेवामा सुधार गर्न अझ संस्थागत संयन्त्र आवश्यक रहेको संकेत पनि दिएको छ।
Posts
