घरबाट विद्यालय गएका तीन विद्यार्थी नफर्किएपछि परिवार चिन्तित , खोजीका लागि अपिल

बाँके, असार २५ ।

बाँकेको कोहलपुर नगरपालिका–३ स्थित बागेश्वरी इङ्ग्लिस मिडियम स्कूलमा अध्ययनरत तीन जना बालक असार २२ गतेदेखि विद्यालयबाट सम्पर्कविहीन भएका छन्।

कक्षा ८ मा अध्ययनरत १५ वर्षीय निरज थापा, १३ वर्षीय पवननाथ योगी र १२ वर्षीय रोबिन्द्र खड्का विद्यालयबाट दिउँसो छुट्टीपछि बेपत्ता भएका हुन्।

इलाका प्रहरी कार्यालय कोहलपुरका प्रमुख प्रहरी नायब उपरीक्षक (डीएसपी) लक्ष्मी खनालले बालकहरू बेपत्ता भएको जानकारी पाएलगत्तै खोजी कार्य सुरु गरिएको बताउनुभयो।

अनुसन्धानको क्रममा तीन जनामध्ये एक जनाले प्रयोग गर्दै आएको मोबाइलमा भारतीय सिमकार्ड सक्रिय भएको देखिएको र अन्य दुई जनाको फेसबुक खाता पनि एक्टिभ अवस्थामा भेटिएको प्रहरीको भनाइ छ।

यस आधारमा तीनै जना भारत गएको हुन सक्ने प्रारम्भिक अनुमान गरिएको छ।

डीएसपी खनालका अनुसार, भारतमा रहेका आफन्तहरू मार्फत पनि खोजी कार्य भइरहेको छ। यद्यपि तीन दिन बितिसक्दा पनि उनीहरूको अवस्था अज्ञात नै रहेको परिवारजनले बताएका छन्।

विद्यालयका प्रधानाध्यापक विष्णु केसीका अनुसार, असार २२ गते दिउँसो ४:३० बजेसम्म ती विद्यार्थीहरू स्कूलमै थिए।

छुट्टीपछि बाहिर निस्केपछि उनीहरू फर्किएनन्। खोजी क्रममा उनीहरूका साथीहरूले पहिल्यैदेखि कतै भाग्ने योजना बनाएको कुरा बताएको प्रधानाध्यापक केसीले जानकारी दिनुभयो।

खोजीमा नेपाल प्रहरी र अनुसन्धान ब्यूरो सक्रिय

विद्यार्थीहरू बेपत्ता भएपछि विद्यालय प्रशासनले इलाका प्रहरी कार्यालय कोहलपुरमा जानकारी गराएको थियो। त्यसैका आधारमा नेपाल प्रहरीको केन्द्रीय अनुसन्धान ब्यूरो (CIB) लाई पनि पत्राचार गरिएको प्रहरीले जनाएको छ।

बालकहरूको अवस्थाबारे भारतका विभिन्न निकायहरूसँग समन्वय गरिँदैछ।

प्रहरीले सार्वजनिक स्थल, सीमा नाका र यातायातका माध्यमबाट समेत निगरानी बढाइएको जनाएको छ।

बेपत्ता बालकहरूका परिवार चिन्तित छन्। "तीन दिन भइसक्यो, अझै पनि केही अत्तोपत्तो छैन", एक अभिभावकले भावुक हुँदै भने, "हामी सरकार, प्रहरी र सम्बन्धित निकायसँग छोराहरू सकुशल फर्काइदिन आग्रह गर्छौं।"

प्रहरीले कसैले देखेमा वा जानकारी भएमा नजिकको प्रहरी कार्यालयमा सम्पर्क गर्न आग्रह गरेको छ।

बेपत्ता बालकहरू सुरक्षित अवस्थामा फेला परुन् भन्ने कामना गर्दै खोजी कार्य तीव्र गतिमा जारी रहेको प्रहरीले जनाएको छ।