दूध दिने गाई–भैँसीमा रेबिज सङ्क्रमण, किसानलाई सतर्कता अपनाउन आग्रह

धादिङ, साउन २०।

जिल्लाका विभिन्न स्थानीय तहमा किसानहरूले पालेका गाई–भैँसीमा रेबिज (रेजिव) सङ्क्रमण देखिएको भन्दै पशु सेवा कार्यालय धादिङले किसानलाई पशु सुरक्षाका प्रभावकारी उपाय अपनाउन आग्रह गरेको छ।

कार्यालयका प्रमुख बवलु ठाकुरका अनुसार रेबिजको मुख्य कारण कुकुरको टोकाइ मात्र नभई जङ्गली जनावरको आक्रमण पनि रहेको छ। उहाँले गोठलाई सुरक्षित बनाउँदै तारवार गर्ने, जङ्गली जनावर र न्याउरी मुसा छिर्न नसक्ने गरी संरचना सुधार गर्न किसानलाई सुझाव दिनुभएको छ।

प्रमुख ठाकुरले गोठको भौतिक र जैविक सुरक्षा मात्र गर्न सके रेबिज सङ्क्रमणबाट बच्न सकिने बताएका छन्। साथै, सङ्क्रमित गाई–भैँसीको दूध बिक्री नगर्न किसानलाई आग्रह गरिएको छ।

कार्यालयले सामुदायिक कुकुरलाई भ्याक्सिन दिने र नियन्त्रणका लागि बन्ध्याकरण कार्यक्रम चलाउन स्थानीय तहलाई सुझाव दिएको छ। रेबिज जङ्गली स्याल, न्याउरी मुसा, कुकुर, बिरालो र मुसाको टोकाइबाट पनि फैलिने भएकाले गोठ सुधार र जनावरलाई सुरक्षित राख्न जोड दिइएको छ।

सबैभन्दा बढी संक्रमण नीलकण्ठ र बेनीघाट रोराङमा

धादिङको नीलकण्ठ नगरपालिका र बेनीघाट रोराङ गाउँपालिकामा किसानले पालेका पशुमा अहिले रेबिज सङ्क्रमण बढी देखिएको जिल्ला पशु सेवा कार्यालयको तथ्याङ्कमा उल्लेख छ।