पहिरो खस्दा अवरुद्ध भएको मुग्लिन–नारायणगढ सडक पूर्ण रूपमा सुचारु

भदौ १,  बारम्बार पहिरो खस्दा अवरुद्ध हुने मुग्लिन–नारायणगढ सडक खण्ड फेरि सञ्चालनमा आएको छ । इच्छा कामना गाउँपालिका–५ तुइँनखोला नजिक आज बिहान खसेको पहिरोका कारण सडक अवरुद्ध भए पनि दिउँसो दुवै तर्फ यातायात पूर्ण रूपमा सुचारु भएको हो ।

आज बिहान ४ः२० बजे खसेको पहिरो पन्छाएसँगै बिहान ८ बजेदेखि यातायात सञ्चालनमा आएको थियो । तर, करिब ९ः३० बजे सोही स्थानमा पुनः पहिरो खस्दा सडक फेरि बन्द भएको थियो ।

जिल्ला प्रहरी कार्यालय चितवनका प्रहरी नायब उपरीक्षक रवीन्द्र खनालका अनुसार दिउँसो १२ः५५ बजे बाटो दुवै तर्फ खुलाइसकिएको छ । “पहिरो पन्छाउने काम सकिएको छ, अहिले बाटो सुचारु भएको छ,” उहाँले बताउनुभयो ।

लगातारको वर्षासँगै सो सडक खण्डमा बारम्बार पहिरो खस्ने क्रम नरोकिएपछि प्रहरी प्रशासनले यात्रुहरूलाई सचेत रहन र आवश्यक सावधानी अपनाउन आग्रह गरेको छ ।