पोखरा अन्तर्राष्ट्रिय विमानस्थल : ‘राष्ट्रिय गौरव’ भनिएको परियोजना अब ‘वित्तीय गलपासो’

पोखरा — पर्यटन सहर पोखरामा अन्तर्राष्ट्रिय विमानस्थल निर्माणको सुरुआत हुँदा जनताले उत्साहपूर्वक स्वागत गरेका थिए । तर, सञ्चालनमा आएको वर्षौँ बितिसक्दा पनि यो विमानस्थलले अपेक्षित लाभ दिन नसक्दा उल्टै मुलुककै आर्थिक, राजस्व, हवाई यातायात र कूटनीतिक क्षेत्रमा भारी बोझ बनेको छ । चरम अनियमितता, खर्च वृद्धि, विवादास्पद ठेक्का प्रक्रिया र संचालनमा देखिएका कमजोरीका कारण पोखरा अन्तर्राष्ट्रिय विमानस्थल देशकै ‘सबैभन्दा विवादास्पद पूर्वाधार काण्ड’ को रुपमा चिनिन थालेको छ ।

८ अर्बदेखि १४ अर्बसम्म अनियमितता, कारबाही अझै अनिश्चित

प्रतिनिधिसभा अन्तर्गतको सार्वजनिक लेखा समितिले झण्डै ८ अर्ब २३ करोडदेखि १४ अर्ब रुपैयाँसम्मको आर्थिक अनियमितता भएको ठहर गर्दै त्यसको विस्तृत छानबिन र कारबाहीका लागि अख्तियार दुरुपयोग अनुसन्धान आयोगलाई पत्राचार गरेको करिब आठ महिना बितिसक्यो । तर, अख्तियारले अध्ययन जारी राखे पनि कुनै ठोस परिणाम सार्वजनिक नभएपछि प्रश्न उठ्न थालेका छन्।

समितिको प्रतिवेदनले लागत दोब्बर बनाइएको, विदेशी ठेकेदारलाई विशेष सुविधा दिएको, स्थानीय सामग्रीलाई विदेशी मूल्यमा मूल्यांकन गरिएका, कर छुटको दुरुपयोग भएको तथा परामर्श सेवामा दोहोरो भुक्तानीसहित थुप्रै अनियमितता पुष्टि गरेको छ।