आय–टिकटका रूपमा हुलाक टिकटको प्रचलन हटाइयो

सांकेतिक तस्वीर 

पुस २ गते । सरकारले प्रचलित कानुनमा व्यवस्था भएको अवस्थामा बाहेक सेवा प्रवाहको प्रक्रियामा कागजातको आधिकारिकताका लागि आय–टिकटका रूपमा हुलाक टिकट टाँस्ने प्रचलन हटाएको छ । सञ्चार तथा सूचना प्रविधिमन्त्री जगदीश खरेलले सोमबारको मन्त्रीपरिषद् बैठकले उक्त निर्णय गरेको जानकारी दिनुभयो ।    

मङ्गलबार मन्त्रीपरिषद्को निर्णय सार्वजनिक गर्दै मन्त्री खरेलले कानुन, न्याय तथा संसदीय मामिलामन्त्री अनिलकुमार सिन्हाको संयोजकत्वमा उच्चस्तरीय राजनीतिक संवाद समिति गठन गर्ने निर्णय भएको पनि जानकारी दिनुभयो । 

त्यस्तै सरकारले एसियाली विकास बैङ्कबाट प्राप्त हुने १२ अर्ब ३८ करोड रुपियाँ बराबरको  सहुलियतपूर्ण ऋण स्वीकार गरेको छ । पुस १२ देखि १४ गतेसम्म काठमाडौँमा सञ्चालन हुने नेपाल–भारत संयुक्त कृषि कार्य समूहको नवौँ बैठकमा सहभागी हुने कृषि तथा पशुपन्छी विकास मन्त्रालयका सहसचिवको संयोजकत्वको नेपाली प्रतिनिधिमण्डल गठन भएको छ ।