पाखिमारे त्रिचालिसको किन्दुभिरमा बोलेरो जिप ४ सय मिटर तल खस्दा एक जनाको ज्यान गयो

 

उदयपुर, मङ्सिर १६ गते ।

उदयपुरको कटारी नगरपालिका–१४ स्थित सिद्धिचरण लोकमार्गको पाखिमारे त्रिचालिस किन्दुभिरमा सोमबार बेलुका बोलेरो जिप दुर्घटना हुँदा एक जनाको मृत्यु भएको छ। ललितपुर महालक्ष्मी नगरपालिका–९ लिबुका ३४ वर्षीय दिपेन्द्र केसीको घटनास्थलमै ज्यान गएको जिल्ला प्रहरी कार्यालय उदयपुरले जनाएको छ।

प्रहरीका अनुसार महालक्ष्मी–९ बाट उदयपुरको ताप्ली गाउँपालिका–५ रुपाटार जाँदै गरेको बोलेरो जिप करिब साँढे पाँच बजे सडकबाट ४ सय मिटर तल खसेर दुर्घटनाग्रस्त भएको हो। जिप आफैँले चलाइरहेका केसीसँग अन्तिम पटक शनिबार राति ८:४४ बजे घर परिवारसँग फोन सम्पर्क भएको प्रहरीले जनाएको छ।

जिप करिब १ किलोमिटर तल भिरमा खसेर क्षतविक्षत अवस्थामा फेला परेको छ। अन्य थप क्षति वा जिपमा अरू कसै सवार थिए कि थिएनन् भन्ने विषयमा भने पुष्टि हुन बाँकी रहेको प्रहरीले जनाएको छ।

मृतकको शव कानुनी प्रक्रिया पूरा गरी मंगलबार बिहान ३ बजे प्रादेशिक अस्पताल कटारीमा पोस्टमार्टमका लागि राखिएको छ। घटनास्थलमा इलाका प्रहरी कार्यालय कटारीका प्रहरी निरीक्षकको नेतृत्वमा टोली खटिएको र उद्धार तथा थप अनुसन्धान जारी रहेको जिल्ला प्रहरी कार्यालय उदयपुरले जनाएको छ।