हुम्ला, चैत ३१ – दुर्गम जिल्ला हुम्लाको दक्षिणी क्षेत्र चङ्खेली गाउँपालिकामा गएराति भएको एक स्काभेटर दुर्घटनामा दुई जनाले ज्यान गुमाएका छन्। स्थानीय विकासका निम्ति भइरहेका पूर्वाधार निर्माण कार्यहरू जोखिमपूर्ण बन्दै गइरहेका बेला यो दुर्घटनाले फेरि एकपटक सुरक्षा मापदण्डको कमजोरीप्रति प्रश्न उठाएको छ।
दुर्घटनामा ४५ वर्षीय परबल कामी र ३१ वर्षीय स्काभेटर चालक अर्जुन कामीको मृत्यु भएको पुष्टि जिल्ला प्रहरी कार्यालय, हुम्लाका प्रहरी नायब उपरीक्षक शङ्कर पोखरेलले गर्नुभएको छ। दुर्घटनामा गम्भीर घाइते दुवै जनाको श्रीमष्ठा प्राथमिक स्वास्थ्यचौकीमा उपचारको क्रममा निधन भएको हो।
दुर्घटना चङ्खेली गाउँपालिका–२ अन्तर्गत लोती–पिपलाङबाट मिमितर्फ गइरहेको स्काभेटर सडकबाट एकाएक चिप्लिएर करिब १०० मिटर तल खस्दा भएको हो। प्रारम्भिक विवरणअनुसार, बिग्रिएको स्काभेटर मर्मतपछि पुनः चलाउने प्रयासका क्रममा अनियन्त्रित भएर दुर्घटना भएको बताइएको छ।
Posts
