घरायसी झगडा या क्रूरता ? १४ वर्ष कान्छी श्रीमतीको निर्मम हत्या, श्रीमान् हिरासतमा

 साउन २, डडेल्धुरा — डडेल्धुराको गन्यापधुरा गाउँपालिका–३ डिल गाउँमा श्रीमतीको हसिया प्रहार गरी हत्या गरेका श्रीमान् पक्राउ परेका छन्। ५४ वर्षीय करन भुलले ४० वर्षीया श्रीमती खिमादेवी भुलको हत्या गरी फरार रहेका बेला प्रहरीले उनलाई नियन्त्रणमा लिएको हो।

प्रहरीका अनुसार साउन १ गते बिहीबार राति करिब ११ बजे घरायसी विवादका क्रममा करनले हसिया प्रहार गरी श्रीमतीको हत्या गरेका थिए। हत्या पश्चात फरार रहेका उनलाई साउन २ गते शुक्रबार बिहान पौने ९ बजे प्रहरीले गोयलबलेकबाट पक्राउ गरेको हो।

पक्राउपछि उनलाई जिल्ला प्रहरी कार्यालय डडेल्धुराको हिरासतमा राखिएको छ। प्रहरी नायब उपरीक्षक (डीएसपी) सुगन्ध श्रेष्ठका अनुसार हसियाको प्रहारबाट खिमादेवीको घटनास्थलमै मृत्यु भएको हो।

हत्या पछिको प्रारम्भिक अनुसन्धानमा घरायसी झगडाकै कारण हत्या भएको देखिएको प्रहरीले जनाएको छ। घटनास्थलको मुचुल्का तयार पारिएको छ र थप अनुसन्धान प्रक्रिया अघि बढाइएको छ।