काठमाडौँ, साउन ३० – लोक सेवा आयोगको प्रतिस्पर्धात्मक परीक्षाबाट सेवामा प्रवेश गरेका निजामती कर्मचारीबीच बिचैमा राजीनामा दिने क्रम तीव्र रूपमा बढिरहेको छ। राष्ट्रिय किताबखाना (निजामती) का तथ्याङ्क अनुसार पछिल्ला चार आर्थिक वर्षमा कुल २,८८५ जना कर्मचारीले सेवा अवधि बाँकी छँदै जागिर छोडेका छन्।
राज्यले ठुलो लगानी गरी तालिम दिँदै दक्ष बनाएका कर्मचारीले सेवाकाल पूरा नगरी बाहिरिएपछि सरकारमाथि आर्थिक भार थपिएको छ। धेरै कर्मचारीले घरायसी कारण देखाउने गरे पनि, पछिल्ला वर्षमा सेवा प्रवाहका क्रममा बढ्दो तनाव, अख्तियार दुरुपयोग अनुसन्धान आयोगमा पर्ने उजुरी, कार्यस्थलमा देखिएको विकृति र स्थानीय तहमा जनप्रतिनिधिद्वारा जबरजस्ती काम लगाउने प्रवृत्ति प्रमुख कारणका रूपमा देखिएका छन्।
यससँगै, श्रीमान्–श्रीमती फरक ठाउँमा कार्यरत हुँदा परिवारको विचल्ली, कमजोर सेवा–सुविधा र अन्य क्षेत्रमा पाएको राम्रो अवसरले पनि कर्मचारीलाई बिचैमा राजीनामा दिन प्रेरित गरेको छ। कार्यालय सहयोगीदेखि उपसचिवसम्मका कर्मचारीले सेवा अवधि पूरा नगरी बाहिरिने गरेका छन् भने, केही सचिवहरूले पेन्सन सुविधाको कारणले अवकाश मितिभन्दा केही दिनअघि मात्र राजीनामा दिने गरेको पाइएको छ।
आर्थिक वर्ष २०७८/७९ मा ७६९, २०७९/८० मा ८०४, २०८०/८१ मा ७१४ र २०८१/८२ मा ५९८ जना कर्मचारीले राजीनामा दिएका छन्। औसतमा वार्षिक ७००–९०० कर्मचारी बिचैमा बाहिरिने गरेका छन्।
महानिर्देशक श्रवणकुमार पोखरेलका अनुसार दक्ष जनशक्तिको दीर्घकालीन उपयोग गर्न सके राज्यको खर्च भार कम हुने भएकाले यस विषयमा सरकार गम्भीर हुन आवश्यक छ। संघीय निजामती सेवा विधेयकमा अवकाश उमेर सीमा ५८ बाट ६० वर्ष पुर्याउने प्रस्ताव गरिएको भए पनि, बिचैमा राजीनामा दिने प्रवृत्तिले नयाँ नियुक्ति, तालिम र पेन्सन दायित्वका कारण राज्यको आर्थिक बोझ बढाइरहेको छ।
.png)
Posts
