स्थानीयवासीले मन्दिरको पूर्वपट्टि रहेको गेट नजिक बिहानको समयमा बन्दुक देखेपछि तत्काल इलाका प्रहरी कार्यालय दमकलाई खबर गरेका थिए।
जानकारी प्राप्त भएपछि प्रहरी निरीक्षक नवीन राईको नेतृत्वमा खटिएको टोली घटनास्थल पुगेको थियो। प्रारम्भिक अनुसन्धानपछि उक्त हतियार गत भदौ २४ गतेको जेन्जी आन्दोलनका क्रममा प्रहरी कार्यालयबाट लुटिएको ३०३ राइफल भएको खुलेको इलाका प्रहरी कार्यालय दमकले जनाएको छ।
प्रहरीका अनुसार राइफल म्यागजिनसहित भेटिएको हो र आवश्यक कानुनी प्रक्रिया पूरा गरी कार्यालयमा सुरक्षित राखिएको छ।
इलाका प्रहरी कार्यालय दमकका प्रवक्ता प्रहरी नायब उपरीक्षक खगेन्द्रबहादुर खड्काले भने,
“सुरक्षा चुनौती बनेका लुटिएका हतियारमध्ये एउटा फिर्ता पर्नु सकारात्मक संकेत हो। बाँकी हतियार खोजीका लागि हाम्रो टोली सक्रिय छ।”
जेन्जी आन्दोलनको नाममा देशभर भएका हिंसात्मक घटनाका क्रममा प्रहरीका हातबाट लुटिएका १२ थान हतियार फिर्ता परिसकेका छन् भने अझै करिब तीन दर्जनभन्दा बढी हतियार फरार प्रदर्शनकारी वा आपराधिक समूहको कब्जामा रहेको प्रहरीको अनुमान छ।
स्रोतका अनुसार, लुटिएका हतियारमध्ये .३०३ राइफल, इन्सास, एसएमजी र शटगन जस्ता शक्तिशाली बन्दुकहरू रहेका छन्। केही हतियार सीमावर्ती क्षेत्रमा हराएको शंका गरिएको छ।
एक सुरक्षा अधिकारीका भनाइमा,
“हतियार फिर्ता हुने क्रमले समाजमा सुरक्षाप्रतिको विश्वास पुनःस्थापित हुँदै गएको संकेत दिएको छ। स्थानीय सहयोगले बाँकी हतियार पनि फिर्ता हुने अपेक्षा गर्न सकिन्छ।”
यसैबीच, गृह मन्त्रालयले सबै प्रदेश प्रहरी कार्यालयलाई लुटिएका हतियार फिर्ता अभियान तीव्र पार्न निर्देशन दिएको छ। साथै, नागरिकलाई शंका लाग्ने वस्तु वा बेवारिसे हतियार देखेमा तुरुन्त प्रहरीलाई जानकारी दिन अनुरोध गरिएको छ।
Posts
