सन्दकपुर, माईजोगमाई र इलाम नगर क्षेत्र सबैभन्दा प्रभावित
इलाम, असोज १९।
गए रातिदेखि निरन्तर परिरहेको अविरल वर्षासँगै आएको बाढी र पहिरोले इलाममा कहर मच्चाएको छ। पछिल्लो विवरण अनुसार जिल्लामा ज्यान गुमाउनेको संख्या ३७ पुगेको छ भने ४ जना बेपत्ता भएका छन्।
इलामकी प्रमुख जिल्ला अधिकारी सुनिता नेपालका अनुसार, मृत्यु हुनेहरू मध्ये सूर्योदय नगरपालिकामा ५ जना, इलाम नगरपालिका–६ मा ६ जना, सन्दकपुर गाउँपालिकामा ६ जना, माङ्सेबुङमा ३ जना, देउमाई नगरपालिकामा ८ जना, माइजोगमाईमा ८ जना, र फाकफोकथुम गाउँपालिकामा १ जना रहेका छन्।
त्यसैगरी, सन्दकपुरका दुई, माइजोगमाईका एक, र इलाम नगरपालिका–६ का एक गरी ४ जना बेपत्ता भएको प्रजिअ नेपालले बताउनुभयो।
उहाँका अनुसार अहिलेसम्म ११ जनाको शवको पोष्टमार्टम सम्पन्न भइसकेको छ भने बाँकीको उद्धार कार्य जारी छ। उद्धार तथा खोजतलासीका लागि सशस्त्र प्रहरी, नेपाली सेना र नेपाल प्रहरीको संयुक्त टोली खटिएको छ।
सशस्त्र प्रहरीले उपलब्ध गराएको प्रारम्भिक तथ्याङ्क अनुसार, इलामकै विभिन्न क्षेत्रमा अझै धेरै परिवार जोखिममा छन्।
सडक र विद्युत् अवरुद्ध हुँदा उद्धार कार्यमा कठिनाइ भइरहेको जिल्ला प्रशासन कार्यालयले जनाएको छ।
स्थानीय प्रशासनले सम्भावित पहिरो र बाढी जोखिममा रहेका बासिन्दालाई सुरक्षित स्थलतर्फ सार्न आग्रह गरेको छ।
Posts
