नाबालिकालाई विवाहको प्रलोभन देखाई दुव्र्व्यवहार, परिवार प्रहरीसमक्ष

सप्तरी । विवाह गर्ने आश्वासन देखाई गाउँकै एक युवाले नाबालिकासँग अनुचित व्यवहार गरेको आरोपमा सप्तरीमा एक परिवार न्यायको खोजीमा परेको छ।

हनुमाननगर कंकालिनी नगरपालिका–१४ रम्पुराका २२ वर्षीय परमेश्वरकुमार मुखियाले गाउँकै कक्षा ५ मा अध्ययनरत १५ वर्षीया नाबालिकालाई ललाइफकाइ विवाहको प्रलोभन देखाई झापाको बिर्तामोडमा लगेर दुई दिनसम्म आफू बसेको स्थानमा राखी दुव्र्व्यवहार गरेको दाबी पीडित परिवारले गरेका छन्।

नाबालिकाले आफूलाई ‘बिहे गर्छु’ भन्दै बिर्तामोड बोलाइएको र त्यहाँ लगेर अनुचित व्यवहार गरिएको बयान प्रहरीलाई दिएकी छन्। उनले आरोपितले जन्मदर्ता प्रमाणपत्र ल्याउनुपर्छ भन्दै आफूलाई भारदहमा छोडेर सम्पर्कविहीन बनेको बताएकी छन्।

दुई दिनपछि घर फर्केपछि अभिभावकले सोधपुछ गर्दा घटना खुलेको परिवारको भनाइ छ। त्यसपछि नाबालिकाका अभिभावकले आरोपितका परिवारसँग विवाहबारे कुरा गर्दा सो प्रस्ताव अस्वीकार गरिएको बताइन्छ।

परमेश्वरकुमार मुखियासँग फोन सम्पर्क हुन नसकेपछि पीडित पक्ष प्रहरीसमक्ष पुगेको छ।

उजुरी जिल्ला प्रहरी कार्यालय सप्तरीमा दर्ता भई आवश्यक कारबाहीका लागि इलाका प्रहरी कार्यालय हनुमाननगरमा पठाइएको पीडित पक्षले जनाएको छ।

इलाका प्रहरी कार्यालय हनुमाननगरले दुवै पक्षलाई मंसिर १४ गते छलफलका लागि बोलाइएको र त्यसपछि कानुनी प्रक्रिया अघि बढाइने सूचना अभिभावकलाई दिएको छ।