मङ्सिर १४ गते । त्रिभुवन विश्वविद्यालयको क्रिकेट रङ्गशालामा जारी दोस्रो संस्करणको नेपाल प्रिमियर लिग (एनपिएल) अन्तर्गत आइतबार कर्णाली याक्स र काठमाडौँ गोर्खाजबीच रोमाञ्चक भिडन्त हुँदैछ। खेल अपराह्न ३ः३० बजे शुरु हुने तय गरिएको छ।
चारवटा खेल खेलिसकेको कर्णाली याक्सले हालसम्म एउटामात्र जित दर्ता गरेको छ। दुई अंकसहित कर्णाली तालिकाको छैटौँ स्थानमा छ। प्लेअफको सम्भावना जिबन्त राख्न आजको खेल कर्णालीका लागि ‘जित या बाहिर’ सरह रहेको छ। सोमपाल कामीको कप्तानीमा रहेको टोली लगातार हारबाट उठ्न खोजिरहेको अवस्थामा महत्वपूर्ण त्राणको अवसर आज प्राप्त गरेको हो।
उता करण केसीको नेतृत्वमा रहेको काठमाडौँ गोर्खाजले पाँच खेलबाट उत्कृष्ट प्रदर्शन गर्दै तेस्रो स्थान ओगटेको छ। प्लेअफमा स्थान बनाउन काठमाडौँका लागि पनि यो खेल बराबर महत्त्वपूर्ण छ। जित हासिल गरे प्लेअफको यात्रा प्रायः सुनिश्चित हुनेछ भने पराजयले प्रतिस्पर्धा थप जटिल बन्न सक्छ।
आजको खेलले दुवै टोलीको एनपिएल यात्रामा निर्णायक मोड ल्याउने भएकाले आइतबारको भिडन्त रोमाञ्चक हुने क्रिकेटविश्लेषकहरूको अनुमान छ।






