कात्तिक ३०, म्याग्दी ।
निर्णय अनुसार मङ्सिर १ देखि २० गतेसम्म, प्रत्येक दिन बिहान १० बजेदेखि साँझ ४ बजेसम्म सवारी आवतजावत पूर्ण रूपमा रोकिनेछ। बिहान–साँझको समय भने सामान्यरूपमा खुला रहने जनाइएको छ।
बेनी–जोमसोम–कोरला सडक आयोजना कार्यालय, जोमसोमको अनुरोधपछि म्याग्दीका प्रमुख जिल्ला अधिकारी बद्रीप्रसाद तिवारीले अत्यावश्यक सेवा—एम्बुलेन्स, बिरामी बोकेका सवारी, तथा विकास निर्माणका अत्यावश्यक ढुवानी बाहेक सबै सवारीलाई वैकल्पिक मार्ग प्रयोग गर्न आग्रह गरेका छन्।
दुई लेनको मापदण्डअनुसार मालढुङ्गादेखि जलजला गाउँपालिका ८, ७, ४ र ३ हुँदै बेनी जोड्ने करिब १३ किलोमिटर सडकको स्तरोन्नति कार्य भइरहेको छ। सडक बन्द अवधिमा यात्रु तथा सवारी चालकले मालढुङ्गा–बागलुङ–रत्नेचौर हुँदै बेनी जाने मार्ग प्रयोग गर्न सक्ने व्यवस्था गरिएको छ।
यस सडकको स्तरोन्नति २०७७ चैतमा ५२ करोड ४६ लाख रुपैयाँ लागतमा ठेक्का सम्झौता गरिए पनि ठेकेदारको ढिलासुस्ती र आयोजनाको कमजोरीका कारण काम अझै पूरा हुन सकेको छैन। ‘कामका लागि खाद्यान्न’ कार्यक्रममार्फत २०४८ सालमा सुरुवात भएको यो सडक २०५२ मा सञ्चालनमा आएको र २०६८ मा कालोपत्र गरिएको थियो। तर पछिल्लो वर्षहरूमा सडक अत्यधिक जीर्ण बन्दै गएकाले पुनःस्तरोन्नति आवश्यक भएको हो।
मालढुङ्गा–बेनी सडक कालीगण्डकी कोरिडोरअन्तर्गत पर्छ, जसलाई चीन र भारत जोड्ने नेपालको सबैभन्दा छोटो अन्तरदेशीय करिडोर मानिन्छ। यसबाट म्याग्दी, मुस्ताङ र पर्वतको जलजला क्षेत्रका हजारौँ बासिन्दा लाभान्वित हुने अपेक्षा गरिएको छ।
Posts
