राजधानी काठमाडौंको नागार्जुन नगरपालिका–३ मा काका र भान्जाबीचको विवाद ज्यान मार्ने अपराधमा परिणत भएको छ। हत्या अभियोगमा प्रहरीले नागार्जुन–३ बसोबास गर्ने २८ वर्षीय सुरज तामाङलाई पक्राउ गरेको छ।
उनले त्यही स्थानमा बस्दै आएका ४५ वर्षीय सन्तोष माझीको हत्या गरेको आरोप लागेको छ। सन्तोष माझी सिन्धुलीको फिक्कल गाउँपालिका–५ स्थायी बासिन्दा थिए।
शुक्रबार (वैशाख १९) दिउँसो सुरजले फलामको पाइप प्रहार गर्दा सन्तोष माझीको घटनास्थलमै मृत्यु भएको प्रारम्भिक अनुसन्धानमा खुलेको प्रहरी प्रधान कार्यालयले जनाएको छ।
प्रहरीका अनुसार, मृतक सन्तोष माझी र आरोपी सुरज तामाङ नातामा काका–भान्जा पर्थे। घटनाको थप कारणबारे अनुसन्धान भइरहेको भए पनि प्रारम्भिक रुपमा घरेलु विवाद वा आपसी झगडाको आशंका गरिएको छ।
घटनापछि प्रहरी वृत्त स्वयम्भूबाट खटिएको टोलीले सुरजलाई पक्राउ गरी नियन्त्रणमा लिएको हो। अहिले उनीमाथि कसुर पुष्टि तथा मुद्दा प्रक्रिया अगाडि बढाउने तयारीमा प्रहरीले अनुसन्धान तीव्र पारेको जनाएको छ।
Posts
