वीरगञ्ज (पर्सा), जेठ ३० गते। वीरगञ्ज महानगरपालिका–२२ स्थित ड्राइपोर्ट सडकको सीताराम चोकमा आज बिहान सवारी दुर्घटनामा परेर दुईजनाको मृत्यु भएको छ भने एकजना घाइते भएका छन्।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) किशोर लम्सालका अनुसार, सिरसियाबाट ड्राइपोर्टतर्फ जाँदै गरेको बागमती प्रदेश ०३–००४ प ८६१२ नम्बरको मोटरसाइकल सडकमा बिग्रिएर रोकिराखिएको भारतीय नम्बर प्लेटको ट्रक (एचआर ५५ के ३९७१) सँग ठोक्किएको थियो।
ठक्करका कारण मोटरसाइकलमा सवार तीनमध्ये २३ वर्षीय रामाकान्त यादव र विजय यादवको उपचारका क्रममा मृत्यु भएको छ। घाइते भएका २२ वर्षीय विजयकुमार यादवको वीरगञ्जस्थित अस्पतालमा उपचार भइरहेको प्रहरीले जनाएको छ।
दुर्घटना आज बिहान ५ बजे भएको हो। प्रहरीका अनुसार, ट्रक सडकमै बिग्रिएर रोकिराखिएको अवस्थामा मोटरसाइकल पछाडिबाट ठोक्किएको थियो।
दुर्घटनाबारे थप अनुसन्धान भइरहेको जिल्ला प्रहरी कार्यालय पर्साले जनाएको छ।
.jpg)
Posts
