असार १०, बिरसेबा (इजरायल) । मध्यपूर्वलाई पुनः अशान्त बनाउने संकेत देखिएको बेला इजरायल र इरानबीचको १२ दिने तनावपूर्ण युद्ध अन्ततः युद्धविराममा पुगेर टुंगिएको छ । अमेरिकी राष्ट्रपति डोनाल्ड ट्रम्पको पहलमा दुवै पक्ष युद्धविरामका लागि सहमत भएका हुन् ।
इरानले कतारस्थित अमेरिकी सैन्य अड्डामा सीमित मिसाइल आक्रमण गरेपछि इजरायलले तेहरान, इस्फहानसहितका क्षेत्रमा प्रतिआक्रमण गरेको थियो । यस अन्तिम कारबाहीमा इरानका विभिन्न सैन्य संरचना र सरकारी स्थलहरू नष्ट भएको र इजरायलले ‘‘आकाशमा नियन्त्रण’’ कायम गरेको दाबी इजरायली प्रधानमन्त्री बेन्जामिन नेतान्याहुले गर्नुभएको छ ।
तर पछिल्लो क्षणमा अमेरिकी राष्ट्रपति ट्रम्पको प्रस्तावमा सहमत हुँदै दुवै मुलुक युद्धविराममा सहमत भए । युद्धविराम मङ्गलबार बिहान ७ः३० बजेबाट लागू गरिएको इरानी राज्य सञ्चारमाध्यमहरूले जनाएका छन् । इजरायलले भने उल्लंघन भए तत्काल कडा जवाफ दिने चेतावनी दिएको छ ।
यो युद्धका क्रममा इजरायलमा इरानी आक्रमणका कारण ४ जनाको मृत्यु र ८ जना घाइते भएका छन् भने इरानमा पनि इजरायली बमबारीका कारण ठूलो क्षति पुगेको छ ।
ट्रम्पको ‘शान्ति’ सन्देश:
“युद्धविराम अब प्रभावमा छ, कृपया उल्लंघन नगर्नुहोस्,” ट्रम्पले ‘ट्रुथ सोसल’ मा लेख्दै युद्ध अन्त्यको घोषणा गर्नुभयो । उनले इजरायल, इरान र समग्र विश्वलाई शान्ति र समृद्धिको कामना गरेका छन् ।
यद्यपि इरानी विदेश मन्त्रालयले भने ‘सम्झौता’ नभएको बताउँदै अन्तिम निर्णय बाँकी रहेको संकेत दिएको छ ।
Posts
