रौतहटको रुबीकुमारी साह हत्या प्रकरण : प्रेमी लक्ष्मण पासवान पक्राउ

भदौ ११ गते, रौतहट । माधवनारायण नगरपालिका–६ की रुबीकुमारी साहको हत्या प्रकरणमा संलग्न भएको आरोप लागेका प्रेमी लक्ष्मण पासवान बुधबार बिहान पक्राउ परेका छन् ।

पासवानले आफ्नै शरीरमा आगो लगाएको अवस्थामा स्थानीयले उद्धार गरी प्रहरीलाई खबर गरेका थिए । तत्पश्चात प्रहरी चौकी माधोपुरको टोलीले उनलाई राजदेवी मन्दिर नजिकबाट उद्धार गरी प्रारम्भिक उपचारका लागि गरुडास्थित बेटर नेपाल अस्पताल पु¥याएको वरिष्ठ प्रहरी हबल्दार राजेश थारूले जानकारी दिए ।

गरुडामा उपचार सम्भव नदेखिएपछि उनलाई थप उपचारका लागि कीर्तिपुरस्थित बर्न अस्पताल रिफर गरिएको इलाका प्रहरी कार्यालय गरुडाका प्रहरी नायब उपरीक्षक राजन कार्कीले जानकारी दिए ।

उद्धार गर्नु अघि पासवानले सामाजिक सञ्जालमा भिडियोमार्फत रुबी साहको हत्या बाध्यतावश गरेको स्वीकार गरेका छन् । जिल्ला प्रहरी कार्यालय रौतहटका प्रवक्ता प्रहरी नायब उपरीक्षक राजु कार्कीका अनुसार अनुसन्धानले समेत रुबी साहको हत्या लक्ष्मण पासवानले नै गरेको पुष्टि गरेको छ ।

गत शनिबार राति गौर–गंगापिपरा सडकखण्डको मुडवलबामा सुटकेसभित्र राखिएको अवस्थामा रुबीकुमारी साहको शव फेला परेको थियो ।