तोकिएको समयमा स्वास्थ्य बिमा नवीकरण नगर्ने बीमित परिवारबाट थप शुल्क लिँदै बिमा बोर्ड

भदौ ११ ।

स्वास्थ्य बीमा बोर्डले बीमित परिवारलाई तोकिएको समयमा बीमा नवीकरण नगरेमा थप शुल्क तिर्नुपर्ने व्यवस्था लागू हुने जनाएको छ।

बोर्डले मंगलबार सूचना जारी गर्दै विगतमा बीमा गरी समयमै नवीकरण नगरेका परिवारलाई आगामी असोज मसान्तभित्र नवीकरण गरेमा एक पटकका लागि अतिरिक्त शुल्क मिनाहा गर्ने निर्णय भएको जनाएको छ। यस अवधिभित्र अनलाइन प्रणाली वा दर्ता सहयोगीमार्फत बीमा नवीकरण गर्न आग्रह गरिएको छ।

सूचना अनुसार असोज मसान्तपछि म्याद गुजारी नवीकरण गर्ने बीमितलाई भने थप शुल्क लाग्नेछ।

• म्याद सकिएको ३ महिनाभित्र नवीकरण गरेमा योगदान रकमको १०% थप शुल्क लाग्नेछ।

• ६ महिनाभित्र नवीकरण गरेमा ३०%,

• ६ महिना देखि १ वर्षभित्र नवीकरण गरेमा ५०%,

• १ वर्षभन्दा बढी भएमा योगदान रकम बराबर (१००%) थप शुल्क,

• २ वर्षभन्दा बढी भएमा योगदान रकमको ३ गुणा,

• ३ वर्षभन्दा बढी भएमा योगदान रकमको ४ गुणा बराबर शुल्क तिर्नुपर्ने व्यवस्था गरिएको छ।

बोर्डले बीमा नवीकरणमा ढिलाइ गर्दा थप आर्थिक बोझ पर्न सक्ने भएकाले तोकिएको समयमा अनिवार्य रूपमा नवीकरण गर्न सबै बीमितलाई अनुरोध गरेको छ।