आजबाट दोस्रो एनपिएल सुरु : ३२ खेल, विश्वस्तरीय खेलाडीको सहभागिता

मङ्सिर १ गते ।

नेपाल प्रिमियर लिग (एनपिएल) को दोस्रो संस्करण आजदेखि त्रिवि अन्तर्राष्ट्रिय क्रिकेट मैदानमा सुरु हुँदैछ। फ्रेन्चाइज क्रिकेटको विश्व–ट्रेनसँगै नेपालले आयोजना गरेको एनपिएल पहिलो संस्करणमै उच्च चर्चा कमाउन सफल भएको थियो। दोस्रो संस्करणले अझ ठूलो उत्साह जगाइरहेको छ।

३२ खेल हुने, उपाधि भिडन्त मंसिर २७ गते

दोस्रो एनपिएलमा सिङ्गल राउन्ड रोबिन, इलिमिनेटर र क्वालिफायर प्रणाली लागू गरिएको छ। यो वर्ष कुल ३२ खेल खेलिने छन्।

स्टेडियमको क्षमता १३ हजार भए पनि हरेक खेलमा ९,५०० टिकट मात्रै बिक्री गरिनेछ।

गत वर्षका आठै टिम सहभागी

गत वर्षका फ्रेन्चाइजहरू यसपटक पनि प्रतिस्पर्धामा छन्—

जनकपुर बोल्ट्स (च्याम्पियन)
सुदूरपश्चिम रोयल्स (उपविजेता)
काठमाडौँ गोर्खाज
चितवन राइनोज
विराटनगर किङ्स
लुम्बिनी लायन्स
पोखरा एभेन्जर्स
कर्णाली याक्स

ती सबै टिमले अक्सनमार्फत विश्वस्तरीय क्रिकेटरहरू भित्र्याएर शक्तिशाली टिम तयार पारेका छन्।

४० भन्दा बढी विदेशी खेलाडी

यस संस्करणमा ४० भन्दा बढी विदेशी खेलाडी सहभागी हुँदैछन्। फाफ डु प्लेसिस, जेसन रोय, वायने पार्नेल, क्रिस लिन, इमरान ताहिर जस्ता चर्चित नाम यसपटक मैदानमा देखिनेछन्।

हरेक टिमले ४ देखि ६ जना विदेशी खेलाडी टिममा राख्न पाउनेछन्।

५ टिमसहित विदेशी प्रशिक्षक पनि

आठ टिममध्ये पाँच टिमले विदेशी प्रशिक्षक नियुक्त गरेका छन्।

जनकपुर बोल्ट्स : शिवनारायण चन्दरपल
विराटनगर किङ्स : पुबुदु दसनायके
काठमाडौँ गोर्खाज : मोन्टी देसाई
पोखरा एभेन्जर्स : राजीव कुमार
लुम्बिनी लायन्स : टिनु योहान्ना

क्यानका सचिव तथा प्रतियोगिता संयोजक पारस खड्का अनुसार अन्तर्राष्ट्रिय स्तरका खेलाडी–प्रशिक्षकको सहभागिताले एनपिएलको ग्लोबल प्रतिष्ठा बढ्नेछ।

नेपाली खेलाडीलाई ठूलो रकम

एनपिएल नेपाली क्रिकेट खेलाडीहरूका लागि आर्थिक रूपमा समेत महत्वपूर्ण मानिन्छ।

मार्की खेलाडी : २० लाख रुपैयाँ
अन्य घरेलु खेलाडी : २ लाखदेखि १५ लाख
प्रतिभा खोजबाट छानिएका आइकोनिक खेलाडीलाई पनि आकर्षक रकम प्रदान

दोस्रो संस्करणको व्यापारिक मूल्य २ अर्बभन्दा माथि लक्ष्य

गत संस्करणमा १ अर्बभन्दा बढी आर्थिक कारोबार भएको थियो।

क्यानका सचिव पारस खड्काले यसपटक ब्रान्ड भ्यालु २ अर्ब रुपैयाँभन्दा माथि पु¥याउने लक्ष्य रहेको बताउनुभयो।

“नेपाली क्रिकेट उद्योगको रूपमा विकसित हुँदैछ। विदेशी खेलाडी, प्रशिक्षक र टिमहरूको लगानीले यसपटक अझ ठूलो कारोबार हुने अपेक्षा छ,” उहाँले भन्नुभयो।

दोस्रो एनपिएल आजबाट औपचारिक रूपमा सुरु भएसँगै करिब एक महिनासम्म देशभरि क्रिकेटको माहोल रहने देखिन्छ। राष्ट्रिय र अन्तर्राष्ट्रिय स्तरका तारा खेलाडीहरू एकै रंगशालामा देखिने भएकाले यो संस्करण ऐतिहासिक बन्ने अपेक्षा गरिएको छ।