सामुदायिक वनमा रातिको समय लुकीछिपी अवैध उत्खनन गर्ने तीन ट्याक्टरसहित तीन जना पक्राउ

वैशाख १८ — धनुषाको मिथिला नगरपालिका–५ मा रहेको औरहीबाबा सामुदायिक वन क्षेत्रबाट रातिको समयमा अवैध रूपमा नदीजन्य सामग्री उत्खनन गरिरहेको अवस्थामा तीनवटा ट्याक्टरसहित तीन जना पक्राउ परेका छन्। डिभिजन वन कार्यालय धनुषाको संयुक्त गस्ती टोलीले बुधबार राति ती व्यक्तिहरूलाई नियन्त्रणमा लिएको हो।

डिभिजन वन कार्यालयका प्रमुख विनोद सिंहका अनुसार सव डिभिजन कार्यालय पुष्पवलपुर र जिल्लाबाट खटिएको टोलीले ज १ त ६३७७, ज १ त ४८५६ र मधेश प्रदेश ०२–००१ त–२८७७ नम्बरका ट्याक्टरहरू नियन्त्रणमा लिएको हो। साथै मिथिला नगरपालिका–५, विश्रामपुरका सामैल अछामी, समिर भुजेल र सुन्दरकुमार महरा पनि पक्राउ परेका छन्।

सिंहका अनुसार पक्राउ परेकाहरूविरुद्ध अवैध उत्खननको आरोपमा आवश्यक अनुसन्धान अगाडि बढाइँदैछ र वन ऐनअनुसार कारबाही प्रक्रिया थालिनेछ। “वन क्षेत्रको सुरक्षा र संरक्षण हाम्रो प्रमुख जिम्मेवारी हो,” सिंहले भने, “यस्ता गैरकानुनी गतिविधिमा संलग्न कसैलाई पनि उन्मुक्ति दिइने छैन।”

पछिल्लो समय धनुषाका विभिन्न सामुदायिक वन क्षेत्रमा रातिको समयमा बालुवा, माटो लगायतका सामग्री अवैध रूपमा उत्खनन गर्ने घटनामा वृद्धि भएको छ। यस्तो गतिविधिले जैविक विविधता र वातावरणीय सन्तुलनमा गम्भीर असर पारिरहेको भन्दै स्थानीय बासिन्दा र सरोकारवालाहरूले कडा निगरानी र नियन्त्रणको माग गर्दै आएका छन्।