अमेरिकाको भर्जिनियास्थित एक घरमा चार नेपाली मृत अवस्थामा फेला

भर्जिनिया, अमेरिका / २०८२ जेठ २४

अमेरिकाको भर्जिनियास्थित मनासस पार्क सहरमा नेपाली समुदायलाई स्तब्ध बनाउने दुःखद घटना घटेको छ। एकै परिवारका चार नेपाली नागरिक आफ्नै डेरामा मृत फेला परेका छन्।

मृत्यु हुनेमा ३८ वर्षीय सन्तोष परियार, ३६ वर्षीया अञ्जु श्रेष्ठ, एक दुई वर्षीय बालक, र एक आठ वर्षीया बालिका रहेका छन्। दुई बालबालिकाको नाम सार्वजनिक गरिएको छैन।

मनासस पार्क प्रहरीले दिएको जानकारी अनुसार उनीहरूको सबैको मृत्यु गोली प्रहारबाट भएको देखिन्छ। प्रारम्भिक अनुसन्धानका आधारमा प्रहरीले यो घटनालाई हत्यापछि आत्महत्या (murder-suicide) भएको हुनसक्ने आशंका गरेको छ।

यो घटना जुन ५ तारिख राति १०:४० बजे सार्वजनिक भएको हो, जब घरधनीले आफ्ना भाडामा बस्ने व्यक्तिहरूसँग सम्पर्क हुन नसकेको भन्दै प्रहरीलाई खबर गरेका थिए। प्रहरी घटनास्थलमा पुगेर अपार्टमेन्ट खोलेपछि चारै जनाको शव फेला परेको थियो।

स्थानीय प्रशासनले घटनास्थललाई सिल गर्दै थप अनुसन्धान जारी राखेको छ भने नेपाली समुदायमा शोकको लहर फैलिएको छ। अमेरिकामा रहेका नेपाली समुदायका अगुवाहरूले यो घटनाले परिवार मात्र नभई सम्पूर्ण प्रवासी नेपाली समाजलाई स्तब्ध बनाएको बताएका छन्।

नेपाल सरकारले पनि अमेरिकी समकक्षी संस्थाहरूसँग समन्वय गर्दै घटनाको यथार्थ पत्ता लगाउन आवश्यक पहल गर्नुपर्ने माग सामाजिक सञ्जालमा उठ्न थालेको छ।

यस हृदयविदारक घटनाले प्रवासमा रहेका नेपालीहरूको मानसिक स्वास्थ्य, पारिवारिक तनाव र सामाजिक सहाराको आवश्यकता विषयमा गम्भीर सोच गर्नुपर्ने अवस्था देखिएको छ।