.jpeg)
जेठ २५, पोखरा— अख्तियार दुरुपयोग अनुसन्धान आयोगले नेपाल आयल निगम गण्डकी प्रादेशिक कार्यालय, कास्कीका प्रमुख चित्तरञ्जन दाससहित पाँच जनाविरुद्ध भ्रष्टाचारको अभियोगमा विशेष अदालत काठमाडौँमा मुद्दा दायर गरेको छ।
आयोगका प्रवक्ता राजेन्द्रकुमार पौडेलद्वारा जारी विज्ञप्तिअनुसार, पेट्रोलियम पदार्थको ढुवानीमा बिलमा उल्लेख भएभन्दा बढी डिजेल पठाएको उजुरीको आधारमा अनुसन्धान गर्दा अनियमितता पुष्टि भएको हो।
अनुसन्धान अनुसार, आयल निगमका गण्डकी प्रमुख दासले गण्डकी धौलागिरि पेट्रोलियम डिलर्स एसोसिएसनका तत्कालीन प्रतिनिधिहरू जगन्नाथ ढुङ्गाना र लक्ष्मण रानाभाटसँग मिलेमतो गरी, सिसी क्यामेरा बन्द गरेर अधिक डिजेल पठाएका थिए।
तीन हजार लिटर डिजेल हिनामिना
अनुसार, १२,००० लिटर डिजेल मात्र पठाउनु पर्नेमा वास्तवमा १५,०३८ लिटर डिजेल पठाइएको थियो। बिलभन्दा ३,०३८ लिटर बढी पठाइएको डिजेलको प्रति लिटर मूल्य १४७ रूपैयाँ अनुसार कुल रु ४,४८,५२५ हिनामिना भएको आयोगको दाबी छ।
उक्त डिजेल बोकेको ट्याङ्करलाई पोखरा महानगरपालिका–२७ मा नियन्त्रणमा लिइएको थियो। अनियमिततामा संलग्न भएको आरोपमा ट्याङ्कर चालक निर्मला थापालाई पनि प्रतिवादी बनाइएको छ।
दायर मुद्दा र बिगो माग
यस घटनामा आयोगले निम्न पाँच जनाविरुद्ध जनही रु ४,४८,५२५ बराबरको बिगो दाबी गर्दै भ्रष्टाचार मुद्दा दायर गरेको छ:
-
चित्तरञ्जन दास – प्रमुख, नेपाल आयल निगम, गण्डकी प्रादेशिक कार्यालय
-
बाबुराम जमरकट्टेल – सञ्चालक, पश्चिमाञ्चल ट्रेडर्स
-
जगन्नाथ ढुङ्गाना – प्रतिनिधि, गण्डकी धौलागिरी पेट्रोलियम डिलर्स एसोसिएसन
-
लक्ष्मण रानाभाट – प्रतिनिधि, गण्डकी धौलागिरी पेट्रोलियम डिलर्स एसोसिएसन
-
निर्मला थापा – ट्याङ्कर चालक
आयोगका अनुसार, डिजेल ढुवानीको क्रममा नियतवश अनियमितता गरिएको पुष्टि भएकाले भ्रष्टाचार निवारण ऐनअनुसार कारबाही अगाडि बढाइएको हो। यो मुद्दा नेपालको इन्धन आपूर्ति प्रणालीमा रहेको संरचनात्मक कमजोरीलाई उजागर गर्ने पछिल्लो कडीको रूपमा हेरिएको छ।
Posts
