विदेश पठाइदिने प्रलोभन: दुई ठग काठमाडौंमा पक्राउ, २१ लाखभन्दा बढी ठगी

साउन ५, काठमाडौं — स्लोभाकिया र सर्बिया पठाइदिने भन्दै लाखौं रुपैयाँ ठगी गर्ने दुई व्यक्तिलाई प्रहरीले काठमाडौंबाट पक्राउ गरेको छ। काठमाडौँ उपत्यका अपराध अनुसन्धान कार्यालयका अनुसार उनीहरूले युवायुवतीलाई विदेश रोजगारीको लोभ देखाएर कुल २१ लाख १० हजार रुपैयाँ ठगी गरेका थिए।

प्रहरीले पहिलो घटनामा गोरखा बारपाक सुलिकोट गाउँपालिका–४ की २९ वर्षीया जुनु राना थापा मगरलाई पक्राउ गरेको छ। उनीमाथि स्लोभाकिया पठाइदिन्छु भन्दै एक पीडितबाट ३ लाख १० हजार रुपैयाँ ठगेको आरोप लागेको छ।

त्यस्तै, दोस्रो घटनामा प्रहरीले बर्दिया गुलरिया नगरपालिका–२ घर भई हाल काठमाडौं–३२ बसोबास गर्दै आएका ३३ वर्षीय सुदीप कुमार यादवलाई पक्राउ गरेको छ। उनले सर्बिया पठाइदिने बहानामा एक पीडितबाट १८ लाख रुपैयाँ ठगी गरेको उजुरीपछि पक्राउ गरिएको प्रहरी कार्यालयका सूचना अधिकारी काजी कुमार आचार्यले जानकारी दिनुभयो।

प्रहरीका अनुसार यादवले बेरोजगार युवायुवतीलाई अमेरिका लैजाने भन्दै लामो समयसम्म झुक्याएर ठगी गरेका थिए। उनीहरु दुवैजना हाल प्रहरी हिरासतमा छन् र आवश्यक अनुसन्धानसहित कानुनी कारबाही अगाडि बढाइएको छ।