वैदेशिक रोजगारीमा आकर्षक तलबको प्रलोभन देखाई मोटो रकम ठगी गर्ने पाँच जना पक्राउ

श्रावण ९,

वैदेशिक रोजगारीमा आकर्षक तलबको प्रलोभन देखाई विभिन्न देश पठाइदिन्छु भन्दै रकम ठगी गरेको आरोपमा पाँच जना पक्राउ परेका छन्।

पक्राउ पर्नेहरूमा लमजुङ दुधपोखरी-४ घर भई हाल टोखा नगरपालिका-९ बस्ने ३५ वर्षीय साजन गुरुङ, रूपन्देही तिलोत्तमा-१ घर भई हाल ललितपुर महालक्ष्मी नगरपालिका-८ बस्ने ३६ वर्षीय दिपक थापा, दाङ घोराही-१५ घर भई हाल काठमाडौं कागेश्वरी मनोहरा नगरपालिका-५ बस्ने ४७ वर्षीय टेक बहादुर केसी, स्याङ्जा वालिङ-७ घर भई हाल ललितपुर महानगरपालिका-२३ बस्ने ५० वर्षीय भरत प्रसाद पाण्डे र पर्वत विहादी-४ घर भई हाल भक्तपुर मध्यपुर थिमी नगरपालिका-३ बस्ने ३८ वर्षीय प्रेम प्रसाद भुषाल रहेका छन्।

उनीहरूले विभिन्न व्यक्तिहरूलाई जर्मनी, जर्जिया, ग्रीस र कोरिया पठाइदिन्छु भन्दै ठूलो रकम असुली गरेको खुलासा भएको छ। साजनले एक जना पीडितबाट १२ लाख ८० हजार रुपैयाँ, दिपकले ३ जना पीडितबाट ६ लाख रुपैयाँ, टेक बहादुरले ६ जना पीडितबाट २१ लाख रुपैयाँ, भरतले ३ जना पीडितबाट २० लाख रुपैयाँ र प्रेमले ३ जना पीडितबाट ३३ लाख ५० हजार रुपैयाँ लिएको पाइएको छ। रकम लिएपछि उनीहरू सम्पर्कविहीन भएको पीडितहरूले उजुरी दिएका थिए।

काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले बुधबार साजन र टेक बहादुरलाई काठमाडौं महानगरपालिका-२६ बाट, दिपकलाई काठमाडौं महानगरपालिका-३० बाट तथा बिहीबार भरत र प्रेमलाई ललितपुर महानगरपालिका-१५ बाट पक्राउ गरेको हो।

पक्राउ परेकालाई आवश्यक अनुसन्धान र कारबाहीका लागि वैदेशिक रोजगार विभाग, ताहाचल, काठमाडौंमा पठाइएको प्रहरीले जनाएको छ।