चौरजहारी जाँदै गरेको हाईस गाडी सल्यानमा दुर्घटना हुँदा १५ जना घाइते

साउन ८, सल्यानमा हाईस दुर्घटना भएको छ। बाँकेको नेपालगन्जबाट सल्यानको रागेचौर हुँदै रुकुम पश्चिमको चौरजहारी जाँदै गरेको हाईस गाडी सल्यानमा दुर्घटना हुँदा १५ जना घाइते भएका छन् ।

बिहीबार दिउँसो १ बजे सल्यानको कुमाख गाउँपालिका २ नेटा नजिकै बराईजिउलामा भे १ ख ३९९४ नम्बरको हाईस दुर्घटना हुँदा चालकसहित १५ जना घाइते भएका हुन् ।

जिल्ला प्रहरी कार्यालय सल्यानका अनुसार दुर्घटनाको खबर लगत्तै इलाका प्रहरी कार्यालय रागेचौरबाट प्रहरी निरीक्षक धर्मेन्द्र खड्काको नेतृत्वमा गएको प्रहरी टोली र स्थानीयले घाइतेको उद्धार गरेका छन् । घाइते मध्य १४ जनालाई उपचारको लागि नेपालगन्ज पठाएको छ भने एक जनालाई चौरजहारी अस्पताल ल्याइएको छ ।

घाइते हुनेहरूमा सल्यानको कुमाख गाउँपालिका ४ बस्ने २८ वर्षीय चालक पारस आचार्य, सोही वडा निवासी ३६ वर्षीय भूपेन्द्र बस्नेत, ६३ वर्षीय टिकाराम आचार्य, ३५ बर्सिया निर्मला बुढाथोकी, १० बर्सिया जेनिशा बुढाथोकी, ७ वर्षीय महेन्द्र बस्नेत, ६२ वर्षीय कलिभान टमाटा, २३ वर्षीय भुवन लामिछाने, सोही गाउँपालिका वडा नम्बर २ निवासी ३२ बर्सिया दिपा बुढाथोकी, उहाँको ६ बर्सिया छोरी कोपिला बुढाथोकी, वडा नम्बर १ निवासी १६ वर्षीय ईन्द्र रावत र २६ वर्षीय डोेले बस्नेत रहनुभएको छ ।

यसै गरी रुकुम पश्चिमको चौरजहारी नगरपालिका १ निवासी ८४ बर्सिया चन्द्र विष्ट, ३१ बर्सिया कुन्ता विष्ट र सुर्खेतको भेरीगंगा नगरपालिका ९ निवासी ३१ बर्सिया तुलसा सुनार घाइते हुनुभएको छ ।  घाइते मध्य दुई जनाको अवस्था गम्भीर रहेको बताइएको छ । गाडी अनियन्त्रित भएर नेटा नजिकैको माथिल्लो मोडबाट करिब ५० मिटर तलको मोडमा पुगेको प्रहरीले जनाएको छ ।