बागलुङमा जीप दुर्घटना, सात जना घाइते

बागलुङ, भदौ १२ ।

सदरमुकाम बागलुङ बजारबाट दक्षिणतर्फ बरेङ गाउँपालिका जाँदै गरेको जीप बिहीबार साँझ दुर्घटनामा पर्दा सात जना घाइते भएका छन्।

जिल्ला प्रहरी कार्यालय बागलुङका प्रहरी नायब उपरीक्षक (प्रनाउ) बसन्तजंग पाण्डेका अनुसार साँझ करिब ७ बजे जैमिनी नगरपालिका–१०, राङखानीस्थित नाम्दुकमा ग १ ज ७४८० नम्बरको जीप सडकबाट करिब १५ मिटर तल खस्दा दुर्घटना भएको हो। जीप घुम्ती मोड्ने क्रममा स्टेरिङ फेल हुँदा दुर्घटना भएको प्रारम्भिक अनुसन्धानमा खुलेको छ।

दुर्घटनामा घाइते हुनेमा—

• चालक बरेङ गाउँपालिका–१ का २० वर्षीय रवि थापा

• सोही ठाउँकी २१ वर्षीय सुस्मिता परियार

• १९ वर्षीय विक्की परियार

• ४० वर्षीय सेती परियार

• ४० वर्षीय सुनिता परियार

• १८ वर्षीय मोहन परियार

• भरतपुर महानगरपालिका–२६ का ५४ वर्षीय ज्योति मगर रहेका छन्।

घाइते सबैको शरीरका विभिन्न भागमा चोट लागेपनि अवस्था सामान्य रहेको प्रनाउ पाण्डेले जानकारी दिनुभयो। उनीहरूलाई उद्धार गरी तत्काल उपचारका लागि धौलागिरी प्रादेशिक अस्पताल बागलुङ पठाइएको छ।

घटनास्थलमा इलाका प्रहरी कार्यालय बरेङका प्रहरी निरीक्षक चन्द्रप्रसाद भण्डारीको नेतृत्वमा प्रहरी टोली खटिएको थियो। स्थानीयवासीको सहयोगमा घाइतेहरूको उद्धार गरिएको प्रहरीले जनाएको छ।