साथीभाइ मिलेर पौडी खेल्न गएका चार किशोरको एकै पटक डुबेर ज्यान गयो

फाइल तस्विर 

कैलाली, भदौ १२।

कैलालीको गोदावरी नगरपालिका–५ हाटखोलीस्थित खुटिया खोलामा पौडी खेल्ने क्रममा डुबेर चार किशोरको मृत्यु भएको छ।

प्रहरी नायब उपरीक्षक रणबहादुर चन्दका अनुसार धनगढी उपमहानगरपालिका–४ रातोपुलका १७ वर्षीय जाबेज भण्डारी, १५ वर्षीय जेब भण्डारी, वडा नं–५ तरानगरका १५ वर्षीय सक्षम जोशी र १७ वर्षीय प्रतिक चौधरीको डुबेर मृत्यु भएको हो।

उनीहरू साथीसँग नुहाउन खोलामा गएका थिए। डुबेको जानकारी पाउनासाथ मालाखेती र स्याउलेबाट खटिएको प्रहरी टोलीले खोजी कार्य थालेको र घटनास्थल नजिकै खोलामै चारैको शव फेला परेको प्रहरीले जनाएको छ।

सोही क्रममा नुहाउन गएका अन्य तीन किशोर भने सकुशल घर फर्किएका छन्। धनगढी बजारबाट करिब १८ किलोमिटर उत्तरतर्फ चुरे फेदमा रहेको खुटिया खोलामा किशोरहरूको समूह पौडी खेल्न गएको थियो।