मलेसियामा आमाछोरीको हत्या आरोपमा नेपाली युवक अदालतमा, प्रमाणित भएमा मण्डलले मृत्युदण्ड अथवा ३० देखि ४० वर्षसम्म कैद भोग्नुपर्ने

ब्राइटर खबर November 29, 2025

मङ्सिर — मलेसियामा आफ्नै घर नजिकै आमाछोरीको हत्या गरेको आरोपमा पक्राउ परेका नेपाली नागरिक दिनेशकुमार मण्डल (३५) लाई स्थानीय मजिस्ट्रेट अदालतमा पेश गरिएको छ । मजिस्ट्रेट नुरुल रसिदाह मोहम्मद अकितको इजलासमा अभियुक्तविरुद्धका दुवै मुद्दा हिन्दी भाषामा पढेर सुनाइएपछि मण्डलले बुझेको संकेत गर्दै टाउको हल्लाएको बताइएको छ ।

मलेसियाली अधिकारकर्मीहरूका अनुसार यो मुद्दा उच्च अदालतको क्षेत्राधिकारअन्तर्गत पर्ने भएकाले प्रारम्भिक चरणमा कुनै बयान दर्ता गरिएको छैन ।

अभियुक्तमाथि गत अक्टोबर १८ का दिन कम्पुङ सेकोलाह जुरुस्थित एक घरमा ५१ वर्षीया सरिया चे हिन र उनकी ११ वर्षीया छोरी नूर अफ्रिना अब्दुल रहीमको हत्या गरेको आरोप छ । घटना दण्डसंहिताको धारा ३०२ अन्तर्गत दर्ता गरिएको छ, जसअनुसार अपराध दिउँसो १२:३० देखि साँझ ७:३० बजेसम्मको बीचमा भएको मानिन्छ ।

मलेसियाली सञ्चारमाध्यमका अनुसार दोषी प्रमाणित भएमा मण्डलले मृत्युदण्ड अथवा ३० देखि ४० वर्षसम्म कैद भोग्नुपर्नेछ । मृत्युदण्ड नलगाइने अवस्थामा उनलाई कम्तीमा १२ कोर्रा (क्यानिङ) सजायसमेत हुने व्यवस्था छ ।

उपसरकारी अभियोजक अनिस सुहादा रोस्लीले अभियुक्तलाई जमानत नदिइने बताउँदै मुद्दा थप अनुसन्धानका लागि २०२६ जनवरीमा पुनः पेश हुने जानकारी दिए । यसअघि अदालतले पोस्टमार्टम, फोरेन्सिक तथा रासायनिक परीक्षण पूरा गर्न समय प्रदान गरेको थियो ।