राष्ट्रिय परिचयपत्र भएका व्यक्तिले घरैबाट मतदाता नामावलीमा नाम दर्ता गर्न सकिने

कात्तिक २८ गते । अबदेखि राष्ट्रिय परिचयपत्रमा नाम दर्ता गराइसकेका व्यक्तिले घरैबाट मतदाता परिचयपत्रमा नाम दर्ता गराउन सक्ने भएका छन् । 

कार्यवाहक प्रमुख निर्वाचन आयुक्त रामप्रसाद भण्डारीले बिहीबार निर्वाचन आयोगमा आयोजित एक कार्यक्रममा यसको शुभारम्भ गर्नुभएको हो । राष्ट्रिय परिचयपत्र तथा पञ्जीकरण विभागको समन्वयमा आयोगले यस्तो व्यवस्था गरेको हो । शुभारम्भ कार्यक्रममा जेनजी अभियानका अभियन्ताको पनि उपस्थिति थियो । 

यस कार्यको शुभारम्भसँगै जिल्ला निर्वाचन कार्यालयमा लाम लागेर मतदाता नामावलीमा नाम लेखाउनुपर्ने झन्झटबाट मतदाताले मुक्ति पाएका छन् । निर्वाचन कार्यालयमा नाम लेखाउनेको भिड बढ्न थालेपछि सरकारले विकल्पका रूपमा परिचयपत्र बनाउँदा दर्ता गरिएको ‘बायोमेट्रिक’ प्रयोग गर्ने निर्णय गरेको हो । 

राष्ट्रिय परिचयपत्रमा दर्ता भइसकेका व्यक्तिले निर्वाचन आयोगको पोर्टलमा गएर आफ्नो नाम दर्ता गर्न सक्ने छन् । यसरी दर्ता गर्दा परिचयपत्र बनाउन प्रयोग गरिएको बायोमेट्रिक नै मतदाता नामावली छपाइमा पनि प्रयोग हुन्छ । यस कार्यको शुभारम्भसँगै नेपालमा राष्ट्रिय परिचयपत्र बनाएर विदेश गएका नागरिकले पनि मतदाता नामावलीमा आफ्नो नाम दर्ता गर्न पाउने भएका छन् । यसका लागि सम्बन्धित व्यक्तिले वेबसाइटमा आफ्नो परिचयपत्र नम्बर र मोबाइल नम्बर प्रविष्ट गर्नु पर्छ । 

यदि विदेशबाट नामावलीमा नाम दर्ता गराउने हो भने मोबाइल नम्बरको सट्टा इमेल ठेगाना प्रविष्ट गर्नु पर्छ । यति गरेपछि परिचयपत्रमा उल्लेख भएको विवरण देखिन्छ । त्यसपछि आफूले मतदान गर्ने प्रदेश, जिल्ला, स्थानीय तहलगायतको विवरण भर्नु पर्छ तर परिचयपत्र नम्बर नभएका व्यक्तिले भने स्वदेश तथा विदेश कतैबाट पनि मतदाता नामावलीमा नाम दर्ता गराउन पाउने छैनन् ।