कञ्चनपुर कारागारमा मदिरा र लागुऔषध कारोबारको आरोप, कैदी

आठ जना गम्भीर घाइते, छानबिन समिति गठनको तयारी

कञ्चनपुर, पुस ५ गते ।

कञ्चनपुर कारागारभित्र लामो समयदेखि हुँदै आएको बेथिति, अवैध कारोबार र आर्थिक अनियमितता सतहमा आएको छ । कारागारका कैदीबन्दीहरू स्वयं एकजुट भई कारागार प्रशासनका कर्मचारी र केही नाइकेविरुद्ध आवाज उठाएपछि उक्त बेथिति सार्वजनिक भएको हो ।

कारागार प्रशासनका कर्मचारी र नाइकेको मिलेमतोमा कारागारभित्र अवैध लागुऔषध तथा मदिराको कारोबार हुँदै आएको, साथै कैदीबन्दीलाई उपलब्ध गराइने सेवा–सुविधामा ठूलो घोटाला भइरहेको आरोप कैदीबन्दीहरूले लगाएका छन् । यही विषयलाई लिएर शुक्रबार कैदी र नाइकेबीच झडप भएको थियो ।

झडपमा आठ जना गम्भीर घाइते

झडपका क्रममा चार नाइके र चार सहनाइके गरी आठ जना गम्भीर घाइते भएका छन् । घाइते हुने नाइकेहरूमा ३४ वर्षीय किरण सिंह, २९ वर्षीय मदन गिरी, २७ वर्षीय सन्दीप भण्डारी र २९ वर्षीय जनक खड्का रहेका छन् ।

त्यस्तै, सहनाइकेहरू दिनेश कुँवर, राजेन्द्र सुनार, रोशन शाही र करण कुँवर घाइते भएका छन् । सबैको महाकाली प्रादेशिक अस्पतालमा उपचार भइरहेको कारागारका सूचना अधिकारी जीवन पन्तले जानकारी दिनुभयो ।

सेवा–सुविधामा घोटालाको आरोप

कैदीबन्दीहरूले कारागार प्रशासनका कर्मचारी र नाइकेको मिलेमतोमा कैदीलाई प्रदान गरिने रकम, रासन तथा खाद्यान्न सामग्रीमा ठूलो घोटाला भइरहेको आरोप लगाएका छन् ।

कारागार ऐन, २०७९ को दफा २० अनुसार कैदीबन्दीलाई मौसमअनुसारको पोसाक उपलब्ध गराउनुपर्ने व्यवस्था भए पनि कञ्चनपुर कारागारले ऐन विपरीत वर्षमा दुई पटक नगद चार हजार रुपैयाँ दिने निर्णय गरेको कैदीबन्दीहरूको भनाइ छ । तर सो रकममध्ये दुई हजार पाँच सय रुपैयाँ मात्र उपलब्ध गराइने गरेको उनीहरूको गुनासो छ ।

३० प्रतिशतसम्म रासन घोटाला भएको दाबी

कारागारमा वितरण हुने रासन र पोसाकमा झण्डै ३० प्रतिशतसम्म घोटाला हुने गरेको आरोप कैदीबन्दीहरूले लगाएका छन् । पोसाकको सट्टा दिइने नगद रकममा मात्रै झण्डै तीन लाख ८४ हजार रुपैयाँ घोटाला भएको उनीहरूको दाबी छ ।

नाइके छनोटसमेत प्रशासनको अनुकूलमा हुने, प्रशासनका कमजोरी बाहिर नल्याउने र कैदीबन्दीप्रति दमनकारी व्यवहार गर्ने व्यक्तिलाई नाइके बनाइने गरेको आरोप पनि कैदीबन्दीहरूले गरेका छन् । पाउनुपर्ने सुविधा मागे वा उजुरी गर्न खोजे अन्य जिल्लाको कारागारमा स्थानान्तरण गरिने धम्की दिइने गरेको उनीहरूको भनाइ छ ।

प्रशासनकै मिलेमतोमा अवैध कारोबार

कारागार प्रशासनको मिलेमतोमा कारागारभित्र मदिरा र लागुऔषधको अवैध कारोबार हुने गरेको गम्भीर आरोपसमेत सार्वजनिक भएको छ । एक कैदीले ‘८८४८’ लेखिएको रक्सीको बोतल देखाउँदै कर्मचारी र नाइकेको मिलेमतोमा मदिरा बिक्री हुने गरेको दाबी गरेका छन् ।

प्रशासन र जिल्ला प्रशासनको प्रतिक्रिया

कञ्चनपुर कारागारमा एक साताअघि मात्र हाजिर हुनुभएकी जेलर वन्दना सुवेदी हाल जिल्ला प्रशासन कार्यालयमा काजमा कार्यरत हुनुहुन्छ । विगत तीन वर्षदेखि रामदत्त जोशी निमित्त जेलरका रूपमा कार्यरत छन् ।

जेलर सुवेदीले भने कारागारमा भएको घोटालाबारे आफूलाई जानकारी नभएको दाबी गर्नुभयो ।

जिल्ला प्रशासन कार्यालय कञ्चनपुरका प्रमुख जिल्ला अधिकारी लक्ष्मण ढकालले भने कारागारमा बेथिति रहेको विषय शुक्रबार मात्रै जानकारी पाएको बताउनुभयो । पछिल्लो समय कारागारको नियमित निरीक्षण नभएको स्वीकार गर्दै, प्रशासनको मिलेमतोमा अवैध कारोबार वा कैदीबन्दीका अधिकार खोसिएको प्रमाणित भए कानुनअनुसार कारबाही गरिने उहाँले स्पष्ट पार्नुभयो ।

प्रमुख जिल्ला अधिकारी ढकालले पोसाकको सट्टा नगद रकम उपलब्ध गराउने निर्णय पारदर्शिताका लागि गरिएको दाबी गर्दै घटनाबारे छानबिन गर्न छिट्टै छानबिन समिति गठन गरिने जानकारी दिनुभयो ।